Chemistry by Inam Jazbi: Meri biaz se meri pasand kay chend Ashaar aur Ghazliyat

*****

مستقل بولتا ہی رہتا ہوں

کتنا خاموش ہوں میں اندر سے

جونؔ ایلیا

*****

میرے انکارِ پرستش نے بچایا ہے مجھے

سر جھکا دوں تو ہر انسان خدا ہو جائے

عرفان ؔصدیقی

*****

بہت پہلے سے ان قدموں کی آہٹ جان لیتے ہیں

تجھے ائے زندگی! ہم دور سے پہچان لیتے ہیں

فراقؔ گورکھپوری

*****

کیا کہے گا کبھی ملنے بھی اگر آئے گا وہ

اب وفاداری کی قسمیں تو نہیں کھائے گا وہ

اجمل سراج

*****

میں جانتا ہوں کس نے کہاں گرد اڑائی
یہ قصے میاں اور کہیں جا کے سنا تو .

علی زریون

*****

دِل میں جو لوگ ہیں ترتِیب میں سب سے پہلے

سب سے آخر میں بُھلانے کے لیے رکھّے ہیں

فیصل عجمی

*****

تجھ پہ زاہد، خدا کرے کہ شراب

خُلد میں بھی حرام ہو جائے

(ماہرالقادری)

*****

زندگی کس طرح بسر ہوگی

دل نہیں لگ رہا محبت میں

جونؔ ایلیا

*****

سحر کا نور گلوں کا نکھار ہیں ہم لوگ

بہار کیا ہے ، کہ جانِ بہار ہیں ہم لوگ

خالد علیگ

*****

و حکمت کا جنہیں شوق ہو آئیں نہ ادھرعلم
کُوچہ عشق میں کچھ بھی نہیں حیرت کے سوا

*****

کس نے کہا اس شہر کی رونق ختم ہوئی!
مقتل میں کچھ لوگ ابھی تک زندہ ہیں!

*****

کتنے پرامید کتنے خوبصورت ہیں یہ لوگ

کیا یہ سب بازو یہ سب چہرے فنا ہوجائیں گے

احمد مشتاق

*****

مجھے خبر ہے خدا میرے انتظار میں ہے

میں آرہا ہوں، صفِ گمرہاں سے ہوتےہوئے!

*****

پھر لوٹ کے اس بزم میں آنے کے نہیں ہیں

ہم لوگ کسی اور زمانے کے نہیں ہیں

شمیم حنفی

*****

ہم تو چاہت میں بھی غالب کے مقلّد ہیں فرازؔ
جس پہ مرتے ہیں اُسے مار کے رکھ دیتے ہیں

احمد فرازؔ

*****

یہ لوگ عشق میں سچے نہیں ہیں ورنہ ہجر

نہ ابتدا نہ کہیں انتہا میں آتا ہے

*****

تمام عمر کا ہے ساتھ آب و ماہی کا

پڑے جو وقت تو پانی نہ جال میں آئے

*****

جنہیں ہم کہہ نہیں سکتے، جنہیں تم سن نہیں سکتے

وہی باتیں ہیں کہنے کی، وہی باتیں ہیں سننے کی

*****

ورثے میں ملی ہے ہمیں بونوں کی قیادت

ہم لوگ بڑے ہوکے بھی چھوٹے ہی رہیں گے

راغب تحسین

*****

سر پر چڑھ کر بول رہے ہیں پودے جیسے لوگ

پیڑ بنے خاموش کھڑے ہیں کیسے کیسے لوگ

*****

واعظا !! تیری پیروی کر کے

سیدھی رہ سے بھٹک گیا ہوں میں

*****

جو مے کدے میں ہو جھگڑا تو پہلے یہ دیکھو

کہ مے کدے میں کہیں شیخ و برہمن تو نہیں

شمیم کرمانی

*****

دامانِ تمنا کی اتنی تہی دامانی

اے بے سروسامانی یہ بے سروسامانی

ہم دیر و حرم دونوں دیکھ آئے ہیں خالدؔ

اس گھر میں بھی سناٹا اس گھر میں بھی ویرانی

*****

وضاحتیں، صفائیاں ساری بے سبب

ذرا دامن پہ داغ کا حساب دیجیے

*****

ایک کتاب سرہانے رکھ دی ایک چراغ ستارا کیا

مالک اس تنہائی میں تو نے کتنا خیال ہمارا کیا

سعودؔ عثمانی

*****

گلاب خواب دوا زہر جام کیا کیا ہے

میں آ گیا ہوں بتا انتظام کیا کیا ہے

راحتؔ اندوری

*****

وہی کارواں وہی قافلہ تمہیں یاد ہو کہ نہ یاد ہو

وہی منزل اور وہی مرحلہ تمہیں یاد ہو کہ نہ یاد ہو

اسمٰعیؔل میرٹھی

*****

دیکھو یہ کارِِعشق نہیں کارِ خیر ہے

تم اس میں کر رہے ہو میاں استخارہ کیا

سعودؔ عثمانی

*****

تری مسجد میں واعظ، خاص ہیں اوقات رحمت کے
ہمارے میکدے میں رات دن رحمت برستی ہے
امیرؔ مینائی

*****

زندگی بکھرتی ہے، شاعری نکھرتی ہے
دل بروں کی گلیوں میں، دل لگی کے کاموںمیں

شعیبؔ بن عزیز

*****

بہاروں میں بھی مے سے پرہیز توبہ !
خمارؔ آپ کافر ہُوئے جا رہے ہیں
خمار ؔ بارہ بنکوی

*****

بند کلیوں کی زباں ہیں ہم لوگ

آتشِ گل کا دھواں ہیں ہم لوگ

زندگی اتنی بھی بے درد نہیں

آگہی بول! کہاں ہیں ہم لوگ

خاطرؔ غزنوی

*****

مرنے والوں کو کہاں دفن کیا

ہم انہیں ساتھ لیے پھرتے ہیں

*****

جو کہہ چکا ہوں اُس سے مکرتا نہیں ہوں میں

اپنے سوا کسی سے ڈرتا نہیں ہوں میں

اے حادث و قدیم کی مردہ روایتو

میں اتنا جانتا ہوں کہ مرتا نہیں ہوں میں

خالدؔ علیگ

*****

اس عمر میں ملتے ہیں، کب یار نشے جیسے

دارو کی طرح تھیکے ، کوکین طبیعت کے

تم بھی تو میاں فاضلؔ، اپنی ہی طرح کے ہو

دیں دار زمانے کے، بے دین طبیعت کے

فاضلؔ جمیلی

*****

جس طرح آپ نے بیمار سے رخصت لی ہے

صاف لگتا ہے، جنازے میں نہیں آئیں گے

*****

خوبصورت ، ذہین ، بچوں سا

وہ ہے اکیسویں صدی کی طرح

بشیرؔ بدر

*****

آگے آگے کوئ مشعل سی لئے چلتا ہے

کیا خبر کون ہے؟ میں نے کبھی پوچھا بھی نہیں

شاز تمکنت

*****

کیا وہ گماں نہیں رہا؟ ہاں وہ گماں نہیں رہا

کیا وہ امید بھی گئی؟ ہاں وہ امید بھی گئی

ایک ہی حادثہ تو ہے اور وہ یہ کہ آج تک

بات نہیں کہی گئی، بات نہیں سنی گئی

جونؔ ایلیا

*****

زاہد کچھ اور ہو نہ ہو میخانے میں مگر
کیا کم ہے یہ کہ فتنۂ دیر و حرم نہیں

(جگرؔ مرادآبادی)

*****

کھیل سارا ہے بس گماں کا میاں
یاں پہ کوئی نہیں وہاں کا میاں

پوچھتا ہوں سوال فطرت سے
سر کھپاتا ہوں آسماں کا میاں

راکھ ہوں راکھ، اپنی ہستی کی
مجھ کو رہنا ہے خاکداں کا میاں

اپنی دنیا بسائے پھرتا ہوں
کیا بھروسہ ہے اس جہاں کا میاں

سب کو نیلا دکھائی دیتا ہے
رنگ، کالا ہے آسماں کا میاں

قیس علی میر

*****

غزل (جونؔ ایلیا)

مِرا اک مشورہ ہے التجا نئیں
تُو میرے پاس سے اس وقت جا نئیں

کوئی دم چین پڑ جاتا مجھے بھی
مگر میں خود سے دم بھر کو جدا نئیں

سفر درپیش ہے اک بے مسافت
مسافت ہو تو کوئی فاصلہ نئیں

محبت کچھ نہ تھی جز بد ہواسی
کہ وہ بندِ قبا ہم سے کھلا نئیں

یہاں معنی کا بےصورت صلہ نئیں
عجب کچھ میں نے سوچا ہے لکھا نئیں

چلائے تیر تو کس کس نے لیکن
میرا قاتل کوئی تیرے سوا نئیں

بچھڑ کر جان تیرے آستاں سے
لگایا جی بہت پر جی لگا نئیں

ہمارا ایک ہی تو مدعا تھا
ہمارا اور کوئی مدعا نئیں

کبھی خود سے مکر جانے میں کیا ہے
میں دستاویز پر لکھا ہوا نئیں

میں خُود سے کچھ بھی کیوں منوا رہا ہوں
میں یاں اپنی طرف بھیجا ہوا نئیں

پتا ہے جانے کس کا، نام میرا
مرا کوئی پتا میرا پتا نئیں

ذرا بھی مجھ سے تم غافل نہ رہیو
میں بے ہوشی میں بھی بے ماجرا نئیں

ہیں اس قامت سوا بھی کتنے قامت
پر اِک حالت ہے جو اس کے سوا نئیں

محبت کچھ نہ تھی جُز بدحواسی
کہ وہ بندِ قبا ہم سے کُھلا نئیں

وہ خُوشبو مجھ سے بچھڑی تھی یہ کہہ کر
منانا سب کو پر اب روٹھنا نئیں

وہ ہجر و وصل تھا سب خواب در خواب
وہ سارا ماجرا جو تھا وہ تھا نئیں

جدائی اپنی بے روداد سی تھی
کہ میں رویا نہ تھا اور پھر ہنسا نئیں

بڑا بے آسرا پن ہے سو چپ رہ
نہیں ہے یہ کوئی مژدہ خدا نئیں